Hüquqşünas Xalid Ağaliyev Azərbaycandan hər il üzrə Avropa İnsan Haqqları Məhkəməsinə göndərilən şikayətlərin sayını açıqlayıb.
Cebhe.info xəbər verir ki, hüquqşünasın hesablamalarına görə, Azərbaycanın AİHM yurisdiksiyasını qəbul etdiyi 2002-ci ildə ölkədən bu məhkəməyə 265 şikayət göndərilib.
Şikayətlərin sayı 2003-cü ildə 266, 2004-cü ildə isə 225 olub:
“2005-ci ildə AİHM-ə göndərilən şikayətlərin sayı 172 olub. Onlardan baxılmasını gözləyən 120 şikayət siyahıdan xaric olunub”.
Xalid Ağaliyev bildirib ki, 2006-cı ildə Azərbaycandan AİHM-ə göndərilən şikayətlərin sayında nəzərəçarpan artım müşahidə olunub. Nəticədə həmin il quruma göndərilən şikayətlərin sayı 445-dən çox olub:
“Həmin il şikayətlərin 57-si qəbul edilməz sayılıb və ya başqa əsasla baxılacaq işlərin siyahısından xaric edilib. 2006-cı ilin sonunda Avropa İnsan Haqqları Məhkəməsində Azərbaycandan göndərilən ümumilikdə 1480 şikayət baxılmasını gözləyirdi”.
Hüquqşünas 2007-ci ildə Azərbaycandan AİHM-ə göndərilən şikayətlərin sayının 708 olduğunu söyləyib:
“2007-ci ilin sonunda baxılmasını gözləyən şikayətlərin ümumi sayı 979 idi. 2008-ci ildə isə şikayətlərin sayında əvvəlki illərlə müqayisədə xeyli azalma müşahidə olunub. Cəmi 334 şikayət. Ancaq baxılmasını gözləyən şikayətlərin sayında isə artım müşahidə olunur - 1051 şikayət”.
Statistikaya əsasən, 2009-cu ildə Azərbaycandan bu məhkəməyə göndərilən şikayətlər 361, baxılmasını gözləyən işlərin ümumi sayı isə 1104 olub. Xalid Ağaliyev qeyd edib ki, 2010, 2011, 2012, 2013-cü illərdə müvafiq olaraq Azərbaycandan məhkəməyə 334, 532, 342, 325 şikayət göndərilib:
“2013-cü ilin sonunda baxılmasını gözləyən ümumi şikayətlərin sayı isə 1293-ə çatıb. 2014-cü ildə göndərilən 403, 2015-ci ildə 268 şikayət göndərilib”.
Onun hesablamalarına əsasən, 2015-ci ildə Azərbaycan baxılmasını gözləyən şikayətlərin sayı üzrə AİHM məkanına daxil olan ölkələrin önünə çıxır:
“Həmin ilin sonunda Azərbaycandan göndərilən 1522 şikayət baxılmasını gözləyirdi ki, bununla da Azərbaycan 48 ölkə arasında ilk onluqda idi. 2016-cı ildə Azərbaycandan göndərilmiş baxılmasını gözləyən şikayətlərin sayı bir qədər də artıb - 1662 şikayət”. Hüquqşünas qeyd edib ki, Azərbaycandan AİHM-ə 2017-ci ildə 679-dan çox, 2018-ci ildə 313 şikayət göndərilib, 2019-cu ildə isə bu rəqəm 397 olub: “2019-cu ilin sonunda baxılmasını gözləyən şikayətlərin sayına görə, Azərbaycan 1950 şikayətlə Avropa Şurası ölkələri arasında 6-cı olub. 2020-ci ildə isə Azərbaycandan quruma 525 şikayət göndərilib. Hazırda Avropa İnsan Haqqları Məhkəməsində Azərbaycandan göndərilmiş 2100 şikayət baxılmasını gözləyir”.