Azərbaycanın müstəqillik tarixinin hər bir səhifəsi qəhrəmanlıq salnaməsi ilə yazılmışdır. Bu salnamənin müəllifləri isə Vətənin dar günündə tərəddüd etmədən silaha sarılan, xalqının azadlığı və torpaqlarının bütövlüyü uğrunda həyatlarını təhlükəyə atan igid oğullardır. Onların sırasında elə insanlar var ki, adları yalnız ailələrinin deyil, bütöv bir xalqın yaddaşına əbədi həkk olunub. Belə vətənpərvər övladlardan biri də Elşən Zakir oğlu Əsgərovdur.
Elşən Əsgərovun həyat yolu Vətən sevgisinin, mərdliyin, fədakarlığın və hərbçi ləyaqətinin parlaq nümunəsidir. O, 1960-cı ildə Azərbaycanın qədim və qəhrəmanlıq ənənələri ilə tanınan Gəncə şəhərində dünyaya göz açmışdır. Uşaqlıq illərindən milli-mənəvi dəyərlərə bağlı, zəhmətkeş və məqsədyönlü bir gənc kimi böyüyən Elşən, təhsilinə də xüsusi önəm vermişdir. O, Gəncə şəhərində yerləşən M. Ə. Sabir adına 5 saylı orta məktəbi müvəffəqiyyətlə bitirmiş, daha sonra Sovet Ordusu sıralarında Arxangelsk vilayətində hərbi xidmət keçmişdir.
Hərbi xidmət illəri onun xarakterinin formalaşmasında mühüm rol oynamışdı. Nizam-intizam, məsuliyyət, dözümlülük və Vətənə xidmət hissi Elşənin həyat prinsiplərinə çevrilmişdi. Xidmətdən sonra təhsilini davam etdirərək 1986-cı ildə Texnologiya İnstitutunu bitirdi. Qarşısında geniş həyat yolları açılsa da, tale onu daha böyük bir missiyaya – Vətənin müdafiəsinə hazırlayırdı.
1990-cı ilin Qanlı Yanvar faciəsi Azərbaycan xalqının tarixində dönüş nöqtəsi oldu. Həmin faciə təkcə xalqımızın qəlbində dərin yaralar açmadı, həm də minlərlə vətənpərvər insanın mübarizə əzmini daha da gücləndirdi. Elşən kimi gənc oğlanlar gələcək planlarını geridə qoyaraq Vətənin müdafiəsini ön plana çəkdilər. Zaman fərqli olsa da əqidəsi bütöv, Vətən sevgisini hər şeydən üstün tutan Vətən oğulları belə hərəkət edir. Eynən Elşən kimi... Elşən Əsgərov da həmin günlərdə hadisələrə biganə qalmadı. O, könüllü olaraq silaha sarıldı və Vətənin müdafiəsinə qalxdı.
Elşən Əsgərov 773 saylı xüsusi təyinatlı hərbi hissənin tərkibində xidmət etməyə başladı. Bu, adi xidmət deyildi. Xüsusi təyinatlı bölmələr ən çətin və təhlükəli döyüş tapşırıqlarını yerinə yetirirdilər. Belə bölmələrdə xidmət etmək yüksək fiziki hazırlıq, iradə, peşəkarlıq və böyük cəsarət tələb edirdi. Elşən bu keyfiyyətlərin hamısını özündə cəmləşdirən döyüşçülərdən biri idi.
Onun döyüş yolu Azərbaycanın müxtəlif bölgələrindən keçdi. Turşsu, Laçın, Cəbrayıl və Ağdərə istiqamətlərində gedən ağır döyüşlərdə iştirak edən Elşən Əsgərov hər zaman ön cəbhədə idi. O, yalnız döyüşlərdə iştirak etməklə kifayətlənmir, eyni zamanda erməni silahlı birləşmələrinə qarşı keçirilən hərbi əməliyyatların hazırlanmasında və təşkilində də fəal rol oynayırdı. Komandanlıq onun peşəkarlığını, düzgün qərar vermək bacarığını və təşəbbüskarlığını yüksək qiymətləndirirdi.
Hərbçi üçün ən böyük mükafat döyüş yoldaşlarının hörmətini qazanmaqdır. Elşən Əsgərov məhz belə insanlardan idi. Döyüş dostları onu təvazökar, səbirli, məsuliyyətli və hər zaman öz üzərində çalışan bir zabit kimi xatırlayırlar. Çətin məqamlarda soyuqqanlılığını qoruması, yoldaşlarına dayaq olması və verilən tapşırıqları qətiyyətlə yerinə yetirməsi onun fərqləndirici xüsusiyyətləri idi.
Göstərdiyi şücaət və nümunəvi xidmətə görə hərbi hissə komandiri tərəfindən dəfələrlə fəxri fərmanlar və qiymətli hədiyyələrlə təltif olunmuşdu. Lakin Elşən üçün ən böyük mükafat Vətənə xidmət etmək idi. O, heç vaxt şöhrət dalınca qaçmırdı. Onun amalında yalnız Azərbaycanın azadlığı və torpaqlarının müdafiəsi dayanırdı.
1993-cü ilin yay ayları Qarabağ cəbhəsində ən ağır dövrlərdən biri idi. Düşmən müxtəlif istiqamətlərdə hücumlarını gücləndirmişdi. Belə bir mürəkkəb şəraitdə Elşən Əsgərov yenə də ön cəbhədə idi. O, Vətənin müdafiəsini öz həyatından üstün tuturdu.
1993-cü il iyunun 26-da Ağdərə rayonunun Vaqauz kəndi istiqamətində gedən ağır döyüşlər zamanı Elşən Zakir oğlu Əsgərov itkin düşdü. Həmin gündən onun taleyi ilə bağlı ailəsinin qəlbində bitməyən bir ümid, xalqımızın yaddaşında isə silinməyən bir qəhrəmanlıq izi qaldı.
İtkin düşmək müharibənin ən ağır nəticələrindən biridir. Bu, yalnız döyüşçünün deyil, onun doğmalarının da ömür boyu daşıdığı ağrıdır. Lakin belə insanlar heç vaxt unudulmurlar. Onlar Vətən uğrunda göstərdikləri fədakarlıqla xalqın yaddaşında yaşayırlar.
Bu gün müstəqil və qalib Azərbaycanın vətəndaşları olaraq rahat yaşaya biliriksə, bu rahatlığın arxasında Elşən Əsgərov kimi minlərlə qəhrəman oğulun əməyi, qanı və fədakarlığı dayanır. Onların göstərdikləri şücaət Azərbaycanın hərb tarixinin ayrılmaz hissəsinə çevrilmişdir.
44 günlük Vətən müharibəsində qazanılan möhtəşəm Zəfər həm də Birinci Qarabağ müharibəsində döyüşən qəhrəmanların arzularının gerçəkləşməsi idi. Onların yarımçıq qalan mübarizəsi davam etdirildi və Azərbaycan öz ərazi bütövlüyünü bərpa etdi. Bu böyük Qələbədə Elşən Əsgərov kimi qəhrəmanların ruhu da yaşayır.
Gənc nəslin vətənpərvərlik ruhunda böyüməsində belə igidlərin həyat yolu xüsusi əhəmiyyət daşıyır. Elşən Əsgərovun ömür yolu göstərir ki, Vətəni sevmək yalnız sözlə deyil, əməli ilə sübut olunur. O, çətin anlarda geri çəkilmədi, şəxsi rahatlığını deyil, dövlətinin taleyini düşündü və ömrünü müqəddəs amal uğrunda fəda etdi.
Bu gün onun adı ehtiramla anılır. Döyüş yoldaşlarının xatirələrində, ailəsinin qəlbində və xalqın yaddaşında Elşən Zakir oğlu Əsgərov mərd, cəsur, təvazökar və əsl Vətən oğlu kimi yaşayır. Onun həyat yolu gələcək nəsillərə örnəkdir. Belə insanlar zaman keçdikcə daha da ucalır, çünki Vətən uğrunda edilən fədakarlıq heç vaxt unudulmur.
Elşən Əsgərovun keçdiyi şərəfli ömür yolu bir daha sübut edir ki, Vətən sevgisi insanın ən ali mənəvi dəyəridir. Torpaq uğrunda mübarizə aparan, xalqının azadlığı naminə həyatını təhlükəyə atan insanlar tarix yazırlar. Onların adı qızıl hərflərlə xalqın yaddaşına həkk olunur.
Əsgərov Elşən Zakir oğlu da məhz belə ömür yaşayan qəhrəmanlardan biridir. Onun adı Azərbaycan tarixində Vətənə sədaqətin, hərbi şücaətin və milli qeyrətin rəmzi kimi yaşayacaq. Qəhrəman döyüşçünün əziz xatirəsi daim ehtiramla yad ediləcək, göstərdiyi fədakarlıq gələcək nəsillər üçün örnək olacaqdır.
Allah bütün şəhidlərimizə rəhmət eləsin, itkin düşmüş qəhrəmanlarımızın əziz xatirəsi xalqımızın qəlbində əbədi yaşasın. Vətən uğrunda canından keçən hər bir Azərbaycan övladı ən yüksək ehtirama layiqdir.
PS. Qalib gəldi ədalət! Elşən Əsgərov kimi Vətən mücahidlərinin narahat ruhu öz rahatlığını tapdı. Vətən göylərində sülh göyərçinləri uçdu. Bu Elşən kimi qəhrəman oğullarımızın göyərçinə dönən ulu ruhlarıdır...
Müqəddəs ruhuna hörmətlə,
Hürü Hacızadə
Yazıçı-publisist
“Qızıl Qələm” mükafatçısı
Pərvanə İmamquliyeva
Gəncə şəhəri 13 saylı körpələr evi–uşaq bağçasının müdiri,
Gəncə şəhər GDRTİ-nin MTM üzrə Yeni Azərbaycan Partiyasının sədri, ictimai xadim
Fərid Faiqoğlu
AJB-nin üzvü
Kökdən, qandan gələn səxavət və şərafət – Pərvanə İmamquliyevanın həyat amalına çevrilən Vətən sevgisi
O, qadındır, Vətəni və xalqı üçün etdiyi fədakarlıqlar güc və iradəsinin təzahürüdür. Adın şərəflidir sənin ey qadın! Bu ifadəni xalq şairi Səməd Vurğun Azərbaycan qadınının Böyüklüyünə həsr etmişdir. Yazılanlar zamanın haşiyəsindən çıxaraq özünün aktuallığını hər zaman saxlayır. Bəli, XXI əsrin içindəyik. Dəyişən zaman olsa da, dəyişməyən bəşəri Tanrılar var. Adəm övladı mövcud olduqca bu bəşəri Tanrılar həmişəyaşardı. Baxır kimdə, baxır necə. Hər kəs bu ləyaqət meyarlarını özündə ehtiva etsəydi dünya zər-zibaya bələnərdi. Onlardan biri, ləyaqətinə, şərəfinə, kökdən və qandan gələn meyarlarına söykənərək yaşayan Vətən qızı - Gəncə şəhəri 13 saylı körpələr evi–uşaq bağçasının müdiri, Gəncə şəhər GDRTİ-nin MTM üzrə Yeni Azərbaycan Partiyasının sədri, ictimai xadim Pərvanə İmamquliyeva. O, həmişə şəhid və qazi ailələrinin yanındadır. Onların dərdinə, sevincinə şərik olmaq Pərvanə xanımın yaşam leytmotivinə çevrilmişdir.
"Adın şərəflidir sənin, ey qadın!" – bu ölməz misralar xalq şairi Səməd Vurğunun Azərbaycan qadınına verdiyi ən yüksək mənəvi dəyərin ifadəsidir. Bu sözlər təkcə poeziya nümunəsi deyil, həm də əsrlər boyu xalqımızın qadına münasibətinin, onun ailədə, cəmiyyətdə və dövlət həyatında tutduğu müqəddəs yerin poetik təcəssümüdür. Zaman dəyişir, nəsillər yenilənir, dünyanın siyasi və ictimai mənzərəsi fərqli çalarlar alır. Lakin dəyişməyən həqiqətlər də var. O həqiqətlər ki, insanın kökündən, qanından, tərbiyəsindən, ailəsindən və mənəviyyatından gəlir.
Belə insanlar cəmiyyətin mənəvi dayaqlarına çevrilirlər. Onlar vəzifələri ilə deyil, insanlıqları ilə seçilir, gördükləri işlərlə yadda qalırlar. Məhz bu xüsusiyyətləri öz şəxsiyyətində birləşdirən ziyalı Azərbaycan qadınlarındandır Pərvanə xanım.
Onun həyat yoluna nəzər saldıqda aydın görünür ki, fəaliyyətinin mərkəzində insan amili dayanır. O, rəhbərlik etdiyi kollektivdə yalnız idarəçi kimi deyil, qayğıkeş ana, müdrik müəllim və xeyirxah insan kimi tanınır. Pərvanə xanım üçün məktəbəqədər təhsil müəssisəsi sadəcə iş yeri deyil, gələcəyin vətəndaşlarının formalaşdığı müqəddəs bir ocaqdır. Burada uşaqlara verilən hər bir sevgi, hər bir qayğı gələcəyin sağlam cəmiyyətinin təməl daşına çevrilir.
Azərbaycan qadını tarix boyu ailənin, dövlətin və milli-mənəvi dəyərlərin qoruyucusu olub. Bu müqəddəs missiyanı bu gün də ləyaqətlə davam etdirən qadınlarımız cəmiyyətimizin inkişafında mühüm rol oynayırlar. Pərvanə İmamquliyeva da öz fəaliyyəti ilə bu ənənələrin davamçısıdır. O, həm idarəçilikdə peşəkarlığı, həm də insanlarla münasibətdə səmimiyyəti ilə seçilən ziyalılardandır.
Xüsusilə Vətən uğrunda canını fəda etmiş şəhidlərimizin ailələrinə və sağlamlığını itirmiş qazilərimizə göstərdiyi diqqət və qayğı onun xarakterinin ayrılmaz hissəsinə çevrilmişdir. Pərvanə xanım üçün şəhid ailəsini ziyarət etmək, onların dərdini dinləmək, sevincinə şərik olmaq, qazilərlə görüşmək sadəcə ictimai fəaliyyət deyil, mənəvi borcdur. Bu münasibət nə hansısa tədbirin tələbi, nə də formal yanaşmadır. Bu, Vətən sevgisinin, milli həmrəyliyin və insanlıq duyğusunun təzahürüdür.
44 günlük Vətən müharibəsindən sonra Azərbaycan xalqının milli birliyi bütün dünyaya nümunə oldu. Həmin birlik bu gün də yaşayır və belə insanların fəaliyyəti ilə daha da möhkəmlənir. Pərvanə İmamquliyeva hər zaman şəhid övladlarına xüsusi qayğı göstərməyi, onların təhsilinə, mənəvi inkişafına diqqət yetirməyi özünün əsas vəzifələrindən biri hesab edir. Çünki o yaxşı bilir ki, bu uşaqlar Azərbaycan xalqının əmanətidir.
Rəhbərlik etdiyi kollektivdə sağlam mənəvi mühitin formalaşdırılması, əməkdaşlar arasında qarşılıqlı hörmət və etimadın yaradılması da onun uğurlu idarəçilik keyfiyyətlərindəndir. O, hesab edir ki, uşaqlara verilən ən böyük tərbiyə nümunəsi böyüklərin davranışıdır. Buna görə də kollektiv daxilində səmimiyyət, mehribanlıq və məsuliyyət hissinin qorunmasına daim xüsusi önəm verir.
Yeni Azərbaycan Partiyasının məktəbəqədər təhsil müəssisələri üzrə sədri kimi də Pərvanə İmamquliyeva dövlətçilik ideyalarının, milli həmrəyliyin və vətənpərvərlik ruhunun təbliğinə xüsusi diqqət yetirir. O, hesab edir ki, müasir Azərbaycan gəncliyi milli köklərinə bağlı, dövlətinə sədaqətli və vətənini sevən vətəndaş kimi yetişməlidir. Bu istiqamətdə həyata keçirilən maarifləndirici tədbirlərdə onun fəal iştirakı cəmiyyət tərəfindən də yüksək qiymətləndirilir.
Onun şəxsiyyətində diqqəti cəlb edən əsas xüsusiyyətlərdən biri təvazökarlıqdır. Böyük işlər görsə də, bunu heç vaxt nümayiş etdirməyə çalışmır. Əksinə, insanlara kömək etməyi həyat tərzi hesab edir. Məhz buna görə də onu tanıyanlar Pərvanə xanımı ilk növbədə yüksək mənəviyyata malik insan kimi xarakterizə edirlər.
Rəhbərlik böyük məsuliyyətdir. Bu məsuliyyəti dərk edən Pərvanə İmamquliyeva gələcəyimiz olan uşaqların sağlam, savadlı və vətənpərvər böyüməsi üçün bütün bilik və bacarığını səfərbər edir. Onun rəhbərlik etdiyi kollektiv milli dəyərlər, dövlət rəmzlərinə hörmət, Vətən sevgisi və humanizm prinsipləri xüsusi yer tutur.
Bu gün Azərbaycan qadını təkcə ailədə deyil, dövlət idarəçiliyində, təhsildə, səhiyyədə, mədəniyyətdə və ictimai həyatda böyük uğurlar qazanır. Bu uğurların müəllifləri sırasında Pərvanə İmamquliyeva kimi fədakar, vətənpərvər və ziyalı qadınların olması cəmiyyətimiz üçün böyük qürur mənbəyidir.
Onun həyat yolu bir daha sübut edir ki, insanın böyüklüyü tutduğu vəzifə ilə deyil, qazandığı hörmətlə ölçülür. Hörmət isə yalnız xeyirxahlıq, vicdan, sədaqət və fədakarlıqla qazanılır. Pərvanə İmamquliyevanın fəaliyyəti də məhz bu ali keyfiyyətlərin vəhdətindən ibarətdir.
Belə ziyalı qadınların fəaliyyəti gələcək nəsillər üçün örnəkdir. Onların gördüyü işlər, nümayiş etdirdiyi vətəndaş mövqeyi və mənəvi dəyərlərə bağlılığı Azərbaycan cəmiyyətinin daha da inkişafına xidmət edir. Çünki kökündən və qanından gələn səxavət və şərafət heç zaman tükənmir, nəsildən-nəslə ötürülərək xalqın milli sərvətinə çevrilir.
Bu xüsusiyyətlər Pərvanə İmamquliyevanın şəxsiyyətini səciyyələndirən ən dəyərli cəhətlərdəndir. O, fəaliyyəti ilə sübut edir ki, Vətənə xidmət yalnız böyük tribunalarla ölçülmür. Bəzən bir uşağın üzündə təbəssüm yaratmaq, bir şəhid anasının əlindən tutmaq, bir qazinin könlünü almaq da Vətənə xidmətin ən ali nümunələrindən biridir.
Məhz buna görə də Pərvanə İmamquliyevanın adı Gəncə ictimaiyyətində xeyirxahlıq, humanizm, ziyalılıq və vətənpərvərlik anlayışları ilə yanaşı çəkilir. Bu isə hər kəsə nəsib olmayan mənəvi sərvətdir.
Pərvanə İmamquliyevanın 26 İyun – Azərbaycan Respublikasının Silahlı Qüvvələri Günü münasibətilə təbriki
"Əziz hərbçilərimiz, qəhrəman zabit və əsgərlərimiz! Sizi 26 İyun – Azərbaycan Respublikasının Silahlı Qüvvələri Günü münasibətilə ürəkdən təbrik edir, hər birinizə möhkəm cansağlığı, şərəfli xidmətinizdə yeni uğurlar arzulayıram. Şəhidlərimizin əziz xatirəsini dərin ehtiramla anır, qazilərimizə Allahdan şəfa diləyirəm. Azərbaycan Ordusu xalqımızın qürur mənbəyidir. Uca Tanrı Ordumuzu, dövlətimizi və xalqımızı daim qorusun. Bayrağımız həmişə zirvələrdə dalğalansın, Vətənimiz əmin-amanlıq və firavanlıq içində yaşasın. Bayramınız mübarək!"
Nəslindən şəhid verən bir insan olaraq bu ağrının nə qədər ağır olduğunu qəlbimlə, ruhumla duyuram. Əmim oğlu Elşən Əsgərov 1993-cü il iyun ayının 26-da Ağdərənin Vaqauz kəndi ətrafında gedən ağır döyüşlərdə itkin düşmüşdür. Bu bir nəslin ağır sağalmayan yarasıdır. Həm də şərafət, fəxarət zirvəsidir. Vətən darda olarsa oğullar qanından keçməlidir. Bu yazılmayan qanundur. Vətən sağ olsun!